كالعادة كل ما افتح الفيس بوك مرة بلاقيه كاتب بماذا تفكر ومرة ماذا تشعر ومرة ما هي حالتك ، طيب ... طيب ، وبعدين ، انت شو دخل اهلك في مزاجي انا حر يا اخي ، يعني حاسس انو يمكن المرة الجاية يكتبلي شو بدك تتغدى اليوم ، ولا شو رأيك نسهر اليوم عالقهوة ، استغفر الله العظيم ، الأمر زاد عن حده ، استغفر الله العظيم ولا حول ولا قوة الا بالله ، شوفوا نسيت !! كاتب فوق انا حر يا اخي عن ( الفيس بوك ) ، يلا معلش ما انا اصلا صرت احس ان الفيس بوك من العيلة ، عادي كأنو عبود ابني قالي مالك يا بابا اليوم مش على بعضك ، اقولكوا بصراحة صدقوني حتى عبود عمرو ما قالي هيك اشي ، بتعرفوا عنجد هسه حسيت انو الفيس بوك معو حق يكتب اللي قلتو في البداية ، على الأقل بسأل عني وعن وضعي وعن حالتي الزفت طبعا ، الحمد لله على كل حال ، اي صاحبي ما بسألني عن حالتي اليوم !!!! استغفر الله العظيم ( قال صاحبي قال ) اي هو ظل صاحب انا كنت بدي اقول ابني ما بسألني عن حالتي اليوم طلعت معي كلمة صاحبي صدقوني بالغلط انا بعتذر من نفسي انا اسف يا نفسي ، والله زبطت معي كلمة نفسي ضحكتني قال بعتذر من نفسي لنفسي ......... انداري .
على فكرة انا كذاب صدقوني ما ضحكت يعني ابتسمت شويه ، بس يعني حاسس اني زي اللي قاعد بهلوس قاعد صار الي ربع ساعة وانا شو اللي بحكيه مع حالي بكتبو معقول حدا بصير معو هيك ، معقول اني بهلوس ؟ معقول ؟ والله كل اشي جايز هالايام ، عنجد كل اشي جايز وممكن .
اي اذا امبارح وانا مروح من الدوام خشيت على كازية بالطريق بدي اعبي بخمس ليرات بنزين اقسم بالله اني قلت للعامل حطلي خمسة كيلو ، بعدها كملت باقي الطريق وانا اقول لحالي كيف طلعت معي خمسة كيلو مش عارف ، انداري !!!!!!!!!!
سيبونا من امبارح وخلونا باليوم خليني افش غلي بالمرة مهي خربانة خربانة وشو ما تصفي تصفي العمر واحد والرب واحد ، والفيس مش مقصر معانا بنكتب اللي بدنا اياه والحلو فيه انو ما بحذف اشي من اللي بنكتبوا مش زي بعض جرايد هاليومين .
اليوم بعد الظهر وانا مروح من الدوام رحت عند احد القضاة في المحكمة استشيرو بشغلة قانونية بتتعلق بشيك بخصني ، وهو قادر يساعدني بالقانون على حلها ، حتى انو واجبو اصلا يساعدني ، اصلا ليش هو موجود اذا ما بدو يساعد بحل شغلة قانونية ما فيها غلط قانوني ، لكن بعد دقيقتين او ثلاثة من الحكي معو ، قال الي رأيو القانوني بنظرو هو طبعا ، وقام وقال بعدها الي انت بتضيع وقتي انا وقتي ثمين ، على فكرة اقسم بالله وما هو عرط زي ما بحكو شباب هاليوم انا كمان قلتلو انا كمان وقتي ثمين ، عندها اتطلعت عليه شكلو ما اعجبو ردي وحسيت انو رايح يخشب علي وقلت في داخلي اختصر يا ولد وروح روح عالدار احسنلك خلص بلاش يروح حدا غيرك يشتري خبز وعشا للدار هاي الليلة .
قال وقتو ثمين !!!!!! يعني انا اللي وقتي مش ثمين صدقوني انو وقتي اثمن من وقتو ، انتو احرار تصدقوا ما تصدقوا اشي بخصكوا بس انا عنجد وقتي اثمن من وقتو هذا اللي انا حاسس فيه على الاقل ، هو على وضعو الوظيفي اكيد عندو سايق ولا خدامة ولا عامل بروحوا بشتروا خبز ولا اي اشي للدار ، بس انا ما في غيري يروح يشتري خبز واي اشي من السوق ، وبعدها بروح اسرفس على الافانتي شوية يعني سبع ساعات يمكن ، طيب هو بروح يسرفس اكيد لا عشان هيك انا بنظري وقتي اثمن من وقتو .
المهم طلعت من عندالقاضي مقبعة معي وصرت احكي مع حالي طيب اذا القاضي مش راضي يساعدك يا ولد بشغلة قانونية بسيطة جدا وهي حق الك مين اللي بدو يساعدك ، المهم وصلت لكلمة انداري زي كل مرة ، مثل باقي هالخلق في بلدنا ، وصلت عند سيارتي ومن غلي شوطت السيارة شلوط بعدو معلم على البودي فيها وصار الانذار يلعلع انفضحت في ساحة المحكمة الكل بتطلع علي وعلى السيارة وانا قاعد بهذرم وبسب وبلعن المهم شوية ولا السيارة زبطت وسحبت حالي وطلعت من المحكمة .
الأدهى من هيك بعد المحكمة ، رحت عند مدير بنك برضو استشارة بسيطة ( بتتعلق بنفس الموضوع اللي سولفتو مع القاضي الموضوع مرتبط ببعضو ) وبعد شوية حكي مع مدير البنك سولفنا انا وياه عن شغلة شيك واشي زي هيك وبرضو كان بقدر يساعدني وحسب القانون لكنو ما بدو مش عارف انا ليش ، لكن هو قال الي هذا رأيو القانوني حسب نظام البنك تبعو ، وكنت ارد على كلامو بردود مفحمة شوي لأنو جنني وكلامو غير منطقي ابدا .
بعد شوي ما اتطلعت الا وهو بقولي انت من اي بلد ، استغفر الله العظيم صرت اطلع في حالي وافكر شو بحكي هذا الزلمة ، انا طبعا في سري لحظتها تخيلت اني يمكن من العراق ولا من الصومال حتى ، طيب ما انت يا محترم سامعني كيف بحكي وسامع لهجتي ، يعني مش باين اني اردني !!!!!!!!!!!!! اه نسيت لحظتها تذكرت انو بجوز بقصد من اي بلد يعني البلد الاصلية، مثلا اني اجاوبو واقول الو اني من عجلون او من عجور مثلا ، على فكرة انا متأكد انو كان يقصد البلد الاصلي ، بس جلطتوا قلتلوا يا زلمة انا اردني زيك مش مبين علي ، ما علينا ، مهو مسكين لو اني جاوبتو صح على سؤالو من اي بلد وقلتلو انو انا من عجور كان ما غلب حالو معي على اساس انو بنسمع الختايرة زي ما بقولوا انو عقول العجاجرة قاسية ودقرين يعني شوي زي الخلايلة ، بدكو الصح هو هذا الحكي في منو حتى بجوز الخلايلة اخف منا شوي بس صدقوني احنا دقرين بس بالحق ، ما علينا المهم شعرت انو اتضايق مني ومن ردودي على كلامو ، شوي ما اتطلعت الا وهو بقول الي خلص هذا رأيي القانوني واحنا في دولة القانون والمؤسسات !!!!!!!! استغفر الله العظيم طيب شو دخل حكينا بموضوع دولة القانون والمؤسسات ، لا حول ولا قوة الا بالله صار بدو يغير الموضوع يعني زي اللي بدو يزايد علي بالوطنية ، قبعت معي مرة ثانية وقلتلو اصلا ما في عندنا قانون ولا مؤسسات ، طبعا استفزني كثير لا هو ولا القاضي راضيين يساعدوني بمشكلتي ، رجعت اقول برضو انداري وقلتلو طيب اذا انت ما بدك تساعدني وتقوم بواجبك والقاضي ما بدو يساعدني برضو ويقوم بواجبو ، وين اروح .
قلتلو حسبي الله ونعم الوكيل ، خلص هسة وانا مروح بروح على المؤسسة الاستهلاكية ، ولا بروح على شركة الكهربا بلكي الحل عندهم ، يعني موضوع شيك اكيد محصور الحل فيه بين محكمة وبين بنك وين ارووووح ادور على حل .
معلش فعلا انا جننتكوا معي بس هذا اللي طلع معي وهذا واللي صار معي اليوم ، والفيس بوك هو اللي استفزني وخلاني اكتب اللي كتبتو ، انا فتحت النت شوية اقرا جريدة ولا حاجة تريح اعصابي لقيت الفيس بوك كاتب بما تفكر على طول بلشت اكتب باللي كنت بفكر فيه مثل ما قال الي الفيس فأي اشي قانوني بلحقني لازم يلحق اصحاب موقع الفيس ايضا مثلي .
كمان لا تفكروني ما بعرف اكتب باللغة الفصحى ، صدقوني بعرف بس اللي صار اليوم ما بنكتب الا هيك ، وزي ما بقولوا هيك مضبطة بدها هيك ختم
على فكرة بعد كتبت اللي كتبتو فوق حسيت انو طويل شوية وقلت بعقلي يا ولد ابعثو لبعض الجرايد على النت بلكي نشروه ، يمكن لما اشوفو على صفحة جريدة احس انو في مسؤول ولا صاحب قرار يمكن يقرأوا ، احتمال يغير هذا المسؤول من طريقة تعامل الموظفين في دائرتو على الأقل مع المواطن اللي مثلي ، ويصيروا يحكوا مع المراجع وهم قريبين من بعض ، مش مثل ما صار معي اليوم ، لاني كنت حاسس اليوم انو القاضي ومدير البنك كانوا يحكوا معي وهم في الطابق العاشر وانا تحت على الارض .
حسبي الله ونعم الوكيل
تعليقات: 0
إرسال تعليق